ആത്മാവില്‍ പരിശുദ്ധാരൂപി ചെയ്യുന്ന പ്രവൃത്തികള്‍
‘സൃഷ്ടാവായ പരിശുദ്ധാരൂപിയേ! നീ എഴുന്നള്ളി വരിക. നിന്റെ വിശ്വാസികളുടെ ഹൃദയങ്ങളെ സന്ദര്‍ശിക്കുക. നിന്റെ സ്‌നേഹത്തിന്റെ അഗ്നിയെ അവരില്‍ കത്തിക്കുക’ (സഭാകീര്‍ത്തനം).
മനുഷ്യാത്മാവില്‍ പരിശുദ്ധാരൂപിയുടെ പ്രവര്‍ത്തികള്‍ മൂന്ന് തരത്തിലാകുന്നു. അതായത് ബോധത്തെ പ്രകാശിപ്പിക്കുന്നു; ഹൃദയത്തെ ഉജ്ജ്വലിപ്പിക്കുന്നു; പ്രവര്‍ത്തികള്‍ക്ക് പൂര്‍ണ്ണത നല്‍കുന്നു.
പരിശുദ്ധാരൂപിയുടെ വെളിച്ചവും സഹായവും എല്ലാക്കാര്യങ്ങളിലും പ്രാര്‍ത്ഥിക്കുകയും നിന്റെ വഴികാട്ടിയായി അവിടുത്തെ തിരഞ്ഞെടുക്കുകയും വേണം. സ്വര്‍ഗ്ഗീയാഗ്രഹങ്ങളിലേയ്ക്ക് നിന്റെ ഹൃദയത്തെ ഉയര്‍ത്തി, ബോധത്തെ പ്രകാശിപ്പിച്ച്, പ്രമാണങ്ങളുടെ വഴിയില്‍ക്കൂടി നിന്നെ നടത്തുവാനും ശുദ്ധനിയോഗത്തോടും സ്‌നേഹത്തോടും കൂടി സകലതും ചെയ്ത് നിത്യസമ്മാനത്തിന് അര്‍ഹനായിത്തീരുവാന്‍ വേണ്ട അനുഗ്രഹമെല്ലാം വെളിച്ചത്തിന്റെയും തീക്ഷ്ണതയുടെയും അരൂപിയായ പരിശുദ്ധാരൂപിയോട് ഇരന്നപേക്ഷിക്കണം.
ജപം
സൃഷ്ടാവായ പരിശുദ്ധാത്മാവേ, എഴുന്നള്ളി വരിക, അങ്ങേ അടിയാരുടെ ബോധങ്ങളെ സന്ദര്‍ശിക്ക. അങ്ങുന്ന് സൃഷ്ടിച്ച ഹൃദയങ്ങളെ അങ്ങേ ഉന്നതമായ വരപ്രസാദത്താല്‍ പൂരിക്കുക.
അങ്ങുന്ന് ആശ്വാസപ്രദനും ഉന്നതനായ ദൈവത്തിന്റെ ദാനവും ജീവനുള്ള ഉറവയും അഗ്നിയും സ്‌നേഹവും ആത്മികാഭിഷേകവുമാകുന്നു.
അങ്ങ് ഏഴുവിധ ദാനങ്ങളോടു കൂടിയവനും പിതാവിന്റെ വലതുകൈയ്യുടെ വിരലുമാകുന്നു. അങ്ങുന്ന് പിതാവിന്റെ ശരിയായ വാഗ്ദാനവും നാവിന് പ്രസാദവരം നല്‍കുന്നവനുമാകുന്നു.
ഇന്ദ്രിയങ്ങള്‍ക്ക് ജ്ഞാനപ്രകാശം കൊടുത്ത് ഹൃദയങ്ങളില്‍ സ്‌നേഹം ചിന്തി ഞങ്ങളുടെ ശരീരബലഹീനതയെ നിത്യശക്തിയാല്‍ ബലപ്പെടുത്തേണമെ.
ശത്രുവിനെ ദൂരെയകറ്റി സമാധാനം നല്‍കി ഞങ്ങള്‍ക്ക് വഴികാട്ടിയായിരുന്ന് സകല തിന്മയില്‍ നിന്നും ഞങ്ങള്‍ ഒഴിവാന്‍ കൃപ ചെയ്യേണമെ.
അങ്ങുന്ന് വഴിയായി പിതാവനെയും പുത്രനെയും, ഇവരിരുവരുടെയും അരൂപിയായ അങ്ങയെയും അറിഞ്ഞ് എല്ലായ്‌പ്പോഴും വിശ്വസിക്കുന്നതിന് കൃപ ചെയ്യേണമെ.
ബാവായ്ക്കും മരിച്ചവരില്‍ നിന്നുയിര്‍ത്ത പുത്രനും ആശ്വാസപ്രദനാകുന്ന പരിശുദ്ധാത്മാവിനും എന്നേയ്ക്കും സ്തുതിയുണ്ടായിരിക്കട്ടെ. ആമ്മേന്‍.
നേതാവ്: സര്‍വ്വേശ്വരാ, നിന്റെ അരൂപിയെ നീ അയയ്ക്ക. അപ്പോള്‍ സകലവും സൃഷ്ടിക്കപ്പെടും.
സമൂ.: അപ്പോള്‍ ഭൂമിയുടെ മുഖത്തെ നീ പുതുതാക്കും.
പ്രാര്‍ത്ഥിക്കാം
പരിശുദ്ധാത്മാവിന്റെ വെളിവാല്‍ വിശ്വാസകളുടെ ഹൃദയങ്ങളെ പഠിപ്പിച്ചസര്‍വ്വേശ്വരാ! ഈ അരൂപിയുടെ സഹായത്താല്‍ ചൊവ്വുള്ളവയെ ഞങ്ങള്‍ ഗ്രഹിപ്പാനും അങ്ങേ ആശ്വാസത്താല്‍ ഏപ്പോഴും ആനന്ദിപ്പാനും കൃപ ചെയ്യേണമേയെന്ന് ഞങ്ങളുടെ കര്‍ത്താവീശോമിശിഹായുടെ യോഗ്യതകളെക്കുറിച്ച് നിന്നോട് ഞങ്ങള്‍ പ്രാര്‍ത്ഥിക്കുന്നു. ആമ്മേന്‍.
1 സ്വര്‍. 1 ന. 7 ത്രി.
