1474 ല്‍ ലൊംബാര്‍ഡിയില്‍ ദെസന്‍ സാനോ എന്ന പട്ടണത്തില്‍ ഉര്‍സുലാ സേവികാസംഘത്തിന്റെ സ്ഥാപകയായ ആഞ്‌ജെലാ മെരീച്ചി ജനിച്ചു. ഈശ്വരഭക്തരായിരുന്ന മാതാപിതാക്കളുടെ ശിക്ഷണം ലഭിച്ചതുകൊണ്ട് കറയറ്റ ജീവിതം നയിക്കാനും മഹത്തായ ലക്ഷ്യങ്ങള്‍ക്കുവേണ്ടി പ്രയത്‌നിക്കാനും ബാല്യത്തില്‍ത്തന്നെ അവള്‍ ദൃഢനിശ്ചയമെടുത്തു. അവള്‍ക്ക് പത്തുവയസ്സ് പ്രായമായപ്പോള്‍ മാതാപിതാക്കള്‍ മരിച്ചു. പിന്നീട് അവള്‍ മൂത്ത സഹോദരിയോടും കൊച്ചനിയനോടുമൊത്തു സാലോവിലുള്ള അമ്മാവന്റെ ഭവനത്തിലേക്കു മാറിത്താമസിച്ചു. 13 വയസ്സായപ്പോള്‍ സഹോദരിയും മരിച്ചു.
കുടുംബാംഗങ്ങളുടെ അപ്രതീക്ഷിതമായ ദേഹവിയോഗം ആഞ്‌ജെലായെ തീവ്രദുഃഖത്തിലാഴ്ത്തി. എങ്കിലും, ക്രമേണ സമസൃഷ്ടികളുടെ നന്മയ്ക്കുവേണ്ടി പ്രവര്‍ത്തിക്കാനുള്ള അഭിനിവേശം അവളില്‍ രൂപപ്പെട്ടതോടെ വിഷാദത്തിന്റെ കരിനിഴല്‍ വീശിയ മനസ്സില്‍ പ്രത്യാശയുടെ പ്രകാശം പ്രസരിച്ചു. ഇരുപത്തിരണ്ടാമത്തെ വയസ്സില്‍ അവള്‍ അമ്മാവന്റെ മരണത്തെത്തുടര്‍ന്ന് ദെസന്‍സാനോവിലേക്കുതന്നെ മടങ്ങി.
അക്കാലത്ത് അവളുടെ ജന്മസ്ഥലത്തെ ദരിദ്രരായ കുട്ടികള്‍ ശരിയായ വിദ്യാഭ്യാസമോ, മതബോധനമോ ലഭിക്കാതെ അസന്മാര്‍ഗ്ഗികജീവിതമാണ് നയിച്ചിരുന്നത്. ഇതുകണ്ടപ്പോള്‍ ആഞ്‌ജെലാ അസ്വസ്ഥയായി. തിളക്കമാര്‍ന്ന ഭാവിയുടെ വാഗ്ദാനങ്ങളായ ആ കുട്ടികളെ വിദ്യകൊണ്ട് ഉദ്ബുദ്ധരാക്കി ഉത്തമ ജീവിതപന്ഥാവിലേക്കു നയിക്കാന്‍ തനിക്ക് എന്തുകൊണ്ടു ശ്രമിച്ചുകൂടാ എന്നായി അവളുടെ ചിന്ത.
തന്നോടൊത്തു ചിന്തിക്കാനും പ്രവര്‍ത്തിക്കാനും സന്നദ്ധരായ ഏതാനും സുഹൃത്തുക്കളെ അവള്‍ കണ്ടെത്തി. അവര്‍ ദെസന്‍സാനോവിലെ ദരിദ്രരായ കുട്ടികളെ വിളിച്ചുകൂട്ടി. അവര്‍ക്ക് വ്യവസ്ഥാപിതമായ രീതിയില്‍ വിദ്യാഭ്യാസം നല്‍കിത്തുടങ്ങി. പ്രാരംഭദശയില്‍ സ്വാഭാവികമായിത്തന്നെ ആഞ്‌ജെലായ്ക്കും സഹപ്രവര്‍ത്തകര്‍ക്കും വളരെയധികം ക്ലേശങ്ങള്‍ നേരിട്ടെങ്കിലും ക്രമേണ തങ്ങളുടെ പ്രവര്‍ത്തനരംഗങ്ങളിലെല്ലാം ആശാവഹമായ വിജയം കൈവരിക്കാന്‍ അവർക്കു സാധിച്ചു.
ഏറെനാള്‍ കഴിയുന്നതിനുമുമ്പ് അവള്‍ തന്റെ പ്രവര്‍ത്തനരംഗമായി ബ്രേഷ്യാ തിരഞ്ഞെടുത്തു. അവിടെ അവള്‍ തന്റെ പ്രവര്‍ത്തനങ്ങള്‍ തുടര്‍ന്നു. ജനങ്ങള്‍ ആഞ്‌ജെലായെ ഒരു വിശുദ്ധയായും പ്രവാചികയായും ആദരിച്ചുപോന്നു. ഒരിക്കല്‍ പരിശുദ്ധ കുര്‍ബാനയില്‍ സംബന്ധിച്ചുകൊണ്ടിരിക്കുമ്പോള്‍ ആഞ്‌ജെലാ ആനന്ദമൂര്‍ച്ഛയില്‍ ലയിക്കുകയും ദീര്‍ഘസമയം ഭൂസ്പര്‍ശമില്ലാതെ വര്‍ത്തിക്കുകയും ചെയ്തു. ഈ സംഭവത്തിന് അനേകം ആളുകള്‍ സാക്ഷ്യംവഹിക്കുകയുണ്ടായി.
1533-ല്‍ ആഞ്‌ജെലാ വിശ്വസ്തരായ ഏതാനും സുഹൃത്തുക്കളെ തിരഞ്ഞെടുത്ത് ഒരു സേവികാസമിതി രൂപവല്‍ക്കരിച്ച് അവര്‍ക്ക് യുക്തമായ പരിശീലനവും നല്‍കി. അവരില്‍ പന്ത്രണ്ടുപേര്‍ ആഞ്‌ജെലായോടൊത്ത് ആശ്രമതുല്യമായ ഒരു ഭവനത്തില്‍ പാര്‍ത്തു. മറ്റുള്ളവര്‍ അവരവരുടെ വീടുകളില്‍ തന്നെ പാര്‍ത്തുകൊണ്ട് സ്വര്‍ഗീയസാഹചര്യങ്ങള്‍ക്കിണങ്ങിയ പ്രേഷിതപ്രവര്‍ത്തനങ്ങളില്‍ ഏര്‍പ്പെട്ടു. രണ്ടുവര്‍ഷം കഴിഞ്ഞപ്പോള്‍ 28 വനിതകള്‍ സമിതിയില്‍ അംഗങ്ങളായി ചേര്‍ന്നു. അങ്ങനെ 1535 നവംബര്‍ 25-ാം തീയതി വി. ഉര്‍സുലായുടെ സേവികാസമിതി ഔപചാരികമായി രൂപവത്ക്കരിക്കപ്പെട്ടു.
ഭൗതികജീവിതം എന്ന യാഥാര്‍ഥ്യത്തെ അവഗണിക്കുകയോ, വിട്ടകലുകയോ അല്ല ലോകവ്യവഹാര വ്യഗ്രതകളുടെ മധ്യത്തില്‍ നിന്നുകൊണ്ട് സകലര്‍ക്കും സേവനം നല്‍കുക എന്നതാണ് സമിതി സ്വീകരിച്ച ലക്ഷ്യം. ദരിദ്രകുടുംങ്ങളിലെ കുട്ടികള്‍ക്കുവേണ്ടിയുള്ള വിദ്യാഭ്യാസപ്രവര്‍ത്തനങ്ങള്‍ക്ക് പരമപ്രാധാന്യം നല്‍കിക്കൊണ്ടുള്ളതായിരുന്നു അവരുടെ കര്‍മ്മപദ്ധതികളെല്ലാം. 1540-ല്‍ വി. ആഞ്‌ജെലാ മെരീച്ചി നിര്യാതയായി.
വിചിന്തനം: നമ്മുടെ ഉള്ളിലുള്ളവന്‍ ലോകത്തിലുള്ളവനേക്കാള്‍ വലിയവനാണ് (1 യോഹ. 4:4).
ഇതര വിശുദ്ധര്‍: സെര്‍ബിയായിലെ സാബസ് (11741236)/ തെയോഡ്രിക്/ ഡാഷിയൂസ്/ എമോരിയൂസ് (എട്ടാം നൂറ്റാണ്ട്)/ ലിമാന്‍സിലെ ജൂലിയന്‍ (മൂന്നാം നൂറ്റാണ്ട്) ലിമാന്‍സിലെ പ്രഥമ മെത്രാന്‍/ ലൂസ് (610) മെത്രാന്‍/ മൗതൂസ് (+555)/ അവിറ്റൂസ്/ മാരിയൂസ് (ആറാം നൂറ്റാണ്ട്)/ ഗാമോ (എട്ടാം നൂറ്റാണ്
ഫാ. ജെ. കൊച്ചുവീട്ടില്‍
