വത്തിക്കാൻ സ്റ്റേറ്റ് സെക്രട്ടറി, കർദ്ദിനാൾ പിയട്രോ പരോളിൻ, ന്യൂയോർക്കിൽ ഐക്യരാഷ്ട്രസഭയുടെ അസംബ്ലിയെ അഭിസംബോധന ചെയ്തു സംസാരിച്ചു. ഉച്ചകോടിയിൽ അദ്ദേഹം മനുഷ്യമഹത്വം പ്രോത്സാഹിപ്പിക്കേണ്ടതിന്റെ ആവശ്യകത ഊന്നിപ്പറയുകയും ഗർഭച്ഛിദ്രവും ലിംഗപരമായ പ്രത്യയശാസ്ത്രവും പ്രോത്സാഹിപ്പിക്കുന്ന അസംബ്ലിയുടെ കാഴ്ചപ്പാടിനെ വത്തിക്കാന്റെ വിയോജിപ്പ് അറിയിക്കുകയും ചെയ്തു.
ലൈംഗികവും പ്രത്യുൽപ്പാദനപരവുമായ ആരോഗ്യത്തിനും പ്രത്യുൽപാദന അവകാശങ്ങളും ഉറപ്പാക്കാൻ ലക്ഷ്യമിടുന്ന ഐക്യരാഷ്ട്ര സംഘടനയുടെ ‘ഭാവിയ്ക്കുള്ള ഉടമ്പടി’ രേഖയെക്കുറിച്ച് വത്തിക്കാന് ആശങ്കയുണ്ട്. ഈ നിബന്ധനകൾ ഗർഭച്ഛിദ്രത്തെ വ്യക്തമായി പരാമർശിക്കുന്നില്ലെങ്കിലും, അവ പലപ്പോഴും ഗർഭച്ഛിദ്ര സേവനങ്ങളിലേക്കുള്ള സാധ്യതയെ ഉൾക്കൊള്ളുന്നു. ഗർഭച്ഛിദ്രം ഒഴികെ, ലൈംഗികതയിലും ദാമ്പത്യ ബന്ധങ്ങളിലും വ്യക്തിഗത പക്വതയ്ക്ക് ഊന്നൽ നൽകിക്കൊണ്ട് ആരോഗ്യത്തിന്റെ സമഗ്രമായ ഒരു ആശയത്തെ പരാമർശിക്കുന്നതായിട്ടാണ് പരിശുദ്ധ സിംഹാസനം ഈ പദങ്ങൾ പരിഗണിക്കുന്നതെന്നു കർദിനാൾ പരോളിൻ വ്യക്തമാക്കി.
ലോകമെമ്പാടും മനുഷ്യന്റെ അന്തസ്സ് പ്രോത്സാഹിപ്പിക്കേണ്ടതിന്റെയും ദാരിദ്ര്യം ഇല്ലാതാക്കുന്നതിന്റെയും പ്രാധാന്യം കർദ്ദിനാൾ പരോളിൻ ഊന്നിപ്പറഞ്ഞു. ലോകസമാധാനം ഉറപ്പാക്കാൻ നിരായുധീകരണത്തിന്റെയും ആണവായുധങ്ങൾ ഇല്ലാതാക്കേണ്ടതിന്റെയും ആവശ്യകതയും അദ്ദേഹം എടുത്തുപറഞ്ഞു. കൂടാതെ, നിർമ്മിത ബുദ്ധി (AI )യുടെ വികസനം നിയന്ത്രിക്കേണ്ടതിന്റെ അടിയന്തിര ആവശ്യകത, ഡാറ്റ സംരക്ഷണം, ഉത്തരവാദിത്തം, പക്ഷപാതം, തൊഴിൽ ആഘാതം എന്നിവ പരിഹരിക്കേണ്ടതിന്റെ ആവശ്യകത എന്നിവയെക്കുറിച്ചും അദ്ദേഹം സംസാരിച്ചു.
