2024 ഒക്‌ടോബർ 20 ഞായറാഴ്ച ഫ്രാൻസിസ് മാർപാപ്പ 14 വാഴ്ത്തപ്പെട്ടവരെ വിശുദ്ധരായി പ്രഖ്യാപിക്കും. പത്തൊൻപതാം നൂറ്റാണ്ടിൽ സിറിയയിൽ കൊല്ലപ്പെട്ട 11 രക്തസാക്ഷികളും രണ്ട് സന്യാസിനിമാരും ഒരു പുരോഹിതനും ഇതിൽ ഉൾപ്പെടുന്നു; അവരിൽ മൂന്ന് സന്യാസ സമൂഹങ്ങളുടെ സ്ഥാപകരും ഉൾപ്പെടുന്നു. രാവിലെ 10.30 ന് സെന്റ് പീറ്റേഴ്‌സ് സ്ക്വയറിൽ നടക്കുന്ന ഈ ചടങ്ങോടെ ഫ്രാൻസിസ് പാപ്പ വിശുദ്ധ പദവിയിലേക്ക് ഉയർത്തിയവരുടെ എണ്ണം 926 ആകും.
എണ്ണൂറിലധികം ഇറ്റാലിയൻ രക്തസാക്ഷികൾ
ജോൺ പോൾ രണ്ടാമൻ പാപ്പ, മാർപാപ്പയായിരുന്ന 27 വർഷത്തിനുള്ളിൽ വിശുദ്ധപദവിയിലേക്ക് ഉയർത്തിയത് 483 പേരെയാണ്. ഫ്രാൻസിസ് പാപ്പ, മാർപാപ്പയായി തിരഞ്ഞെടുക്കപ്പെട്ട് രണ്ടു മാസത്തിനുശേഷം, 2013 മെയ് മാസത്തിൽ സെന്റ് പീറ്റേഴ്‌സ് സ്ക്വയറിൽ നടത്തിയ തന്റെ ആദ്യത്തെ വിശുദ്ധപദവി പ്രഖ്യാപനവേളയിൽ എണ്ണൂറിലധികം പേരെ വിശുദ്ധപദവിയിലേക്ക് ഉയർത്തി. 2013 ഫെബ്രുവരി 11-ന് രാജി പ്രഖ്യാപിച്ച ദിവസം ബെനഡിക്ട് പതിനാറാമൻ പാപ്പ അംഗീകരിച്ചവരും ഈ ഗ്രൂപ്പിൽ ഉൾപ്പെട്ടിരുന്നു. 1480-ൽ തുർക്കികൾ കൂട്ടക്കൊല ചെയ്ത ഒട്രാന്റോയിലെ 813 ഇറ്റാലിയൻ രക്തസാക്ഷികളായിരുന്നു ഇവർ.
മൂന്ന് മാർപാപ്പമാർ വിശുദ്ധ പദവിയിലേക്ക്
ഫ്രാൻസിസ് പാപ്പ വിശുദ്ധരായി പ്രഖ്യാപിക്കപ്പെട്ടവരുടെ പട്ടികയിൽ അദ്ദേഹത്തിന്റെ മുൻഗാമികളിൽ മൂന്നുപേർ ഉൾപ്പെടുന്നു. 2014 ഏപ്രിലിൽ, ഫ്രാൻസിസ് മാർപാപ്പ എമിരിറ്റസ് ബെനഡിക്റ്റ് പതിനാറാമൻ പാപ്പയുടെ സാന്നിധ്യത്തിൽ ജോൺ 23-ാമനെയും ജോൺ പോൾ രണ്ടാമനെയും വിശുദ്ധരായി പ്രഖ്യാപിച്ചു.
2018-ൽ, പോൾ ആറാമൻ മാർപാപ്പയെയും ഫ്രാൻസിസ് മാർപാപ്പ വിശുദ്ധനായി പ്രഖ്യാപിച്ചു. 2000-ൽ ജോൺ പോൾ രണ്ടാമൻ പാപ്പ പയസ് IX-നെയും ജോൺ XXIII-നെയും ഒരുമിച്ച് വിശുദ്ധപദവിയിലേക്ക് ഉയർത്തിയിരുന്നു.
