സിറിയയിൽ കടുത്ത പ്രതിസന്ധി നേരിടുന്ന ഈ സമയത്ത് തങ്ങളുടെ പ്രാർഥനകളും സഹായങ്ങളും വാഗ്ദാനം ചെയ്തും അലപ്പോയിലെ മെത്രാന്മാരെ അഭിസംബോധന ചെയ്തുകൊണ്ടും കത്തയച്ച് യൂറോപ്പിലെ മെത്രാൻസമിതി. വിമതർ അലപ്പോ നഗരം പിടിച്ചടക്കുകയും നിലവിലുള്ള സർക്കാരിനെ താഴെയിറക്കിയതിനെയും തുടർന്ന് രാജ്യത്തെമ്പാടും ആക്രമണങ്ങളും ഭീകരതയും ശക്തമായിരിക്കുകയാണ്. സിറിയയിൽ നടക്കുന്ന സംഭവവികാസങ്ങൾ സസൂക്ഷ്മം വീക്ഷിക്കുകയും സമാധാനപരമായ അധികാര കൈമാറ്റം സാധ്യമാകുമെന്നു പ്രതീക്ഷിക്കുന്നതായും കത്തിൽ എടുത്തുപറയുന്നു.
രാഷ്ട്രത്തെ സമ്പന്നമാക്കുന്ന നിരവധി വംശീയ, മതന്യൂനപക്ഷങ്ങളുടെ സംഭാവനകളും അതുല്യമായ സാന്നിധ്യവും കണക്കിലെടുത്തുകൊണ്ട് വിഭാഗീയതയെയും തീവ്രവാദത്തെയും തള്ളിക്കളയണമെന്നും പുതിയ ഭരണകൂടത്തോട് മെത്രാന്മാർ അഭ്യർഥിക്കുന്നു. ആഭ്യന്തരമായി കുടിയൊഴിപ്പിക്കപ്പെട്ട ആളുകളെ തിരികെ അവരുടെ ഭവനങ്ങളിൽ എത്തിക്കാനുള്ള ശ്രമങ്ങൾക്കും സമിതി ആഹ്വാനം നൽകുന്നു.
അലപ്പോയിലും സിറിയയുടെ മറ്റു ഭാഗങ്ങളിലും മെത്രാന്മാരും വിശ്വാസികളും അനുഭവിക്കുന്ന കഷ്ടപ്പാടുകളോടും അനിശ്ചിതത്വത്തോടും നിറഞ്ഞ ഹൃദയത്തോടെ ഐക്യദാർഢ്യവും അനുകമ്പയും പ്രഖ്യാപിക്കുന്നുവെന്നാണ് കത്തിൽ പറയുന്നത്. വീടുകൾ പുനർനിർമിക്കുന്നതിനും ഉപജീവനമാർഗം പുനഃസ്ഥാപിക്കുന്നതിനും നിലവിലുള്ള സംഘർഷത്തിന് സമാധാനപരമായ പരിഹാരം കണ്ടെത്തുന്നതിനുമുള്ള സഹായങ്ങളും മെത്രാൻസമിതി കത്തിൽ ഉറപ്പുനൽകുന്നു.
കടപ്പാട്: വത്തിക്കാൻ ന്യൂസ്
