നെയ്യാറ്റിൻകര, വിശാഖപട്ടണം, ജൽപയ്ഗുരി, ഷില്ലോംഗ് എന്നീ രൂപതകൾക്കുവേണ്ടി നാലു മെത്രാന്മാരെ പാപ്പ ശനിയാഴ്ച (08/02/25) നാമനിർദേശം ചെയ്തു.
നെയ്യാറ്റിൻകര രൂപതാവൈദികനായ സെൽവരാജൻ ദാസനെ ഫ്രാൻസിസ് പാപ്പ പ്രസ്തുത രൂപതയുടെ പിന്തുടർച്ചാവകാശമുള്ള മെത്രാനായി നിയമിച്ചു. രൂപതാ ജുഡീഷ്യൽ വികാരിയായും തിരുപുറം വിശുദ്ധ ഫ്രാൻസിസ് സേവ്യർ ഇടവകയുടെ വികാരിയായും സേവനമനുഷ്ഠിച്ചുവരികയായിരുന്നു അദ്ദേഹം.
1962 ജനുവരി 27 ന് നെയ്യാറ്റിൻകര രൂപതാതിർത്തിയിലുള്ള വലിയവിളയിൽ ജനിച്ച നിയുക്ത മെത്രാൻ ആലുവ സെൻറ് ജോസഫ്സ് പൊന്തിഫിക്കൽ സെമിനാരിയിൽ വൈദികപഠനം പൂർത്തിയാക്കുകയും 1987 ഡിസംബർ 23 ന് പൗരോഹിത്യം സ്വീകരിക്കുകയും ചെയ്തു. അദ്ദേഹം ബെൽജിയത്തിലെ ലുവെയിൻ കത്തോലിക്കാ സർവകലാശാലയിൽ നിന്ന് കാനൻ നിയമത്തിൽ ഡോക്ടറേറ്റ് നേടിയിട്ടുണ്ട്.
പശ്ചിമ ബംഗാളിലെ ജയ്പൽഗുരി രൂപതയുടെ മെത്രാനായി നിയമിതനായിരിക്കുന്നത് വൈദികൻ ഫാബിയൊ തോപ്പൊയാണ്. പ്രസ്തുത രൂപതയുടെ മെത്രാൻ ക്ലെമെൻറ് തിർക്കി കാനൻ നിയമാനുസാരം സമർപ്പിച്ച രാജി സ്വീകരിച്ചതിനെ തുടർന്നാണ് പാപ്പ ഈ നിയമനം നടത്തിയത്.
ചത്തിസ്ഗാറിലെ ജഷ്പൂർ രൂപതയിലെ ദരുപിസയിൽ 1960 ഡിസംബർ 21 നു ജനിച്ച നിയുക്ത മെത്രാൻ ഫാബിയൊ തോപ്പൊ,1994 ഡിസംബർ 3 ന് പൗരോഹിത്യം സ്വീകരിച്ചു. അഡ്മിനിസ്ട്രേറ്റീവ് കാനൻ നിയമത്തിൽ ഡിപ്ലോമയുംറോമിലെ ഉർബനിയാന പൊന്തിഫിക്കൽ സർവകലാശാലയിൽ നിന്ന് ബൈബിൾ ദൈവവിജ്ഞാനീയത്തിൽ ഡോക്ടറേറ്റും അദ്ദേഹം നേടിയിട്ടുണ്ട്.
ശനിയാഴ്ച പാപ്പ ഭാരതസഭയിൽ നടത്തിയ നിയമനങ്ങളിൽ മറ്റൊന്ന് ആന്ധ്രപ്രദേശിലെ വിശാഖപട്ടണം അതിരൂപതയുടെ ആർച്ചുബിഷപ്പിന്റെതാണ്. വാറംഗൽ രൂപതയുടെ മെത്രാനായി സേവനമനുഷ്ഠിച്ചു വരികയായിരുന്ന ബിഷപ്പ് ഉഡുമല ബാല ഷൊറെഡിയാണ് വിശാഖപട്ടണം ആർച്ചുബിഷപ്പായി ഉയർത്തപ്പെട്ടിരിക്കുന്നത്.
മേഘാലയയിലെ ഷില്ലോംഗ് അതിരൂപതയുടെ സഹായമെത്രാനായി വൈദികൻ ബെർണ്ണാഡ് ലാലൂനെ നാമനിർദേശം ചെയ്തുകൊണ്ടുള്ള ഉത്തരവും പാപ്പ ശനിയാഴ്ച പുറപ്പെടുവിച്ചു. 1976 ജൂൺ 16 ന് മേഘാലയയിലെ ലയിറ്റ്ലിംഗോട്ട് എന്ന സ്ഥലത്തു ജനിച്ച നിയുക്ത മെത്രാൻ ബെർണ്ണാഡ് ലാലൂ 2006 ഏപ്രിൽ 30 നാണ് പൗരോഹിത്യം സ്വീകരിച്ചത്. ഇടവക സഹവികാരി, കോളേജ് അഡ്മിനിസ്ട്രേറ്റർ, സെമിനാരിയിൽ പഠനവിഭാഗ മേധാവി, വിദ്യാലയാധ്യക്ഷൻ, അതിരൂപതാ സാമൂഹ്യ സേവനകേന്ദ്ര മേധാവി, അതിരൂപതാ ചാൻസലർ തുടങ്ങിയ വിവിധ തലങ്ങളിൽ പ്രവർത്തിച്ചിട്ടുണ്ട് നിയുക്ത മെത്രാൻ ലാലൂ.
കടപ്പാട്: വത്തിക്കാൻ ന്യൂസ്
