മ്യാൻമറിലും തായ്‌ലൻഡിലും ഉണ്ടായ അതിശക്തമായ ഭൂചലനത്തിൽ മരണം 150 കടന്നു. 700 ലധികം പേർക്ക് പരിക്കേൽക്കുകയും ചെയ്തതായി റിപ്പോർട്ടുണ്ട്. 7.7 തീവ്രത രേഖപ്പെടുത്തിയ ഭൂചലനത്തിൽ നിരവധി നാശനഷ്ടങ്ങൾ ഉണ്ടായതായാണ് പുറത്തുവരുന്ന വിവരം. ആദ്യമുണ്ടായ ഭൂചലനത്തിനു തൊട്ടുപിന്നാലെ രണ്ടാമതും ഭൂചലനം ഉണ്ടായി. രണ്ടാമതുണ്ടായ ഭൂചലനം 6.8 തീവ്രത രേഖപ്പെടുത്തി.
യുണൈറ്റഡ് സ്റ്റേറ്റ്സ് ജിയോളജിക്കൽ സർവേയുടെ കണക്ക് പ്രകാരം, മാന്റ്‍ലെയിൽ നിന്ന് 17.2 കിലോമീറ്റർ അകലെയുള്ള നഗരമാണ് ഭൂചലനത്തിന്റെ പ്രഭവകേന്ദ്രമായി കരുതപ്പെടുന്നത്. ശക്തമായ ഭൂചലനത്തിനു പിന്നാലെ നൂറുകണക്കിന് ആളുകൾ കെട്ടിടങ്ങളിൽനിന്നും വീടുകളിൽനിന്നുമായി പുറത്തേക്ക് ഇറങ്ങിയോടുകയായിരുന്നു.
വടക്കൻ, മധ്യ തായ്‌ലൻഡിലെ വളരെ ദൂരെയുള്ള പ്രദേശങ്ങളിൽപോലും ഭൂചലനത്തിന്റെ പ്രഭാവം അനുഭവപ്പെട്ടിട്ടുണ്ട്. മ്യാൻമറിൽ കനത്ത നാശനഷ്ടങ്ങളാണ് ഭൂചലനത്തിൽ സംഭവിച്ചത്. അതേസമയം, മ്യാൻമറിൽ നിന്നുള്ള വിവരങ്ങൾ സർക്കാർ പുറത്തുവിടാൻ മടിക്കുന്നതായും ആരോപണമുണ്ട്. ഉയരത്തിലുള്ള കെട്ടിടങ്ങളിലുള്ള സ്വിമ്മിങ് പൂളുകളിലെ വെള്ളം പോലും ഭൂചനലനത്തിൽ താഴേക്ക് ഒഴുകിയതായി റിപ്പോർട്ടുകളുണ്ട്.
മ്യാൻമറിനു പിന്നാലെ തായ്ലൻഡ്, വിയറ്റ്നാം ഉൾപ്പെടെയുള്ള അയൽരാജ്യങ്ങളിലും ഭൂചലനം അനുഭവപ്പെട്ടു. തായ്ലൻഡ് പ്രധാനമന്ത്രി പയേതുങ്താൻ ഷിനവത്ര സ്ഥിതിഗതികൾ അവലോകനം ചെയ്യാനായി അടിയന്തരയോഗം വിളിച്ചുചേർത്തു. ഇതിനകം തന്നെ ഭൂചലനത്തിന്റെ ചില വീഡിയോകൾ പുറത്തുവന്നിട്ടുണ്ട്. വലിയ കെട്ടിടങ്ങൾ നിലംപതിക്കുന്നതും ആളുകൾ നിലവിളിച്ച് ഓടുന്നതുമെല്ലാം വീഡിയോയിൽ ദൃശ്യമാണ്.
