കരുതലിന്റെ വക്താക്കളാകണം നാം ഓരോരുത്തരുമെന്ന് കോട്ടയം അതിരൂപത മെത്രാപ്പോലീത്ത മാർ മാത്യു മൂലക്കാട്ട്. മണ്ണിനോടും ജലത്തോടും സഹജീവികളോടും പ്രകൃതിവസ്തുക്കളോടുമുള്ള മനുഷ്യന്റെ കരുതലാണ് നാളെയുടെ സമ്പത്ത് എന്ന് അദ്ദേഹം കൂട്ടിച്ചേർത്തു. കോട്ടയം അതിരൂപതയുടെ ഇടുക്കി ജില്ലയിലെ സാമൂഹ്യസേവന വിഭാഗമായ ഗ്രീൻവാലി ഡെവലപ്പ്മെന്റ് സൊസൈറ്റിയുടെ ‘കരുതാം നാളേയ്ക്കായി’ എന്ന കുടിവെള്ള സംഭരണ ടാങ്കുകളുടെ വിതരണപദ്ധതി ഉദ്‌ഘാടനം ചെയ്തു സംസാരിക്കുകയായിരുന്നു മാർ മാത്യു മൂലക്കാട്ട്.
ഗ്രീൻവാലി ഡെവലപ്പ്മെന്റ് സൊസൈറ്റിയുടെ പ്രവർത്തനഗ്രാമങ്ങളിലുള്ള സ്വാശ്രയസംഘ പ്രവർത്തകർക്കായി കുടിവെള്ളം സംഭരിച്ചു സൂക്ഷിക്കുന്നതിനും വേനലിനെ അതിജീവിക്കുന്നതിനുമുള്ള പദ്ധതിയാണ് കരുതാം നാളേയ്ക്കായി. സബ്സിഡി നിരക്കിൽ വായ്‌പാസൗകര്യം ലഭ്യമാക്കിക്കൊണ്ടാണ് പദ്ധതി നടപ്പിലാക്കുന്നത്.
ചടങ്ങിൽ ഗ്രീൻവാലി ഡെവലപ്പ്മെന്റ് സൊസൈറ്റി സെക്രട്ടറി ഫാ. ജോബിൻ പ്ലാച്ചേരിപ്പുറത്ത്, ഫാ. ബിബിൻ ചക്കുങ്കൽ, പ്രോഗ്രാം ഓഫീസർ സിറിയക് പറമുണ്ടയിൽ, പ്രോഗ്രാം കോ-ഓർഡിനേറ്റർ സിസ്റ്റർ ജിജി വെളിഞ്ചായിൽ, മെറിൻ എബ്രഹാം, അനിമേറ്റർ സിനി സജി എന്നിവർ പ്രസംഗിച്ചു.
പദ്ധതിയുടെ ഒന്നാം ഘട്ടമായി 3,35,000 ലിറ്റർ ജലസംഭരണ ടാങ്കുകളാണ് വിതരണം ചെയ്യുന്നത്.
