യുദ്ധത്താൽ വലയുന്ന ഉക്രൈനിലെ ജനങ്ങൾക്ക് അടിയന്തരസഹായം നല്കാനും ആ ജനതയെ പുനരധിവസിപ്പിക്കാനുമായി കത്തോലിക്കാ സഭയുടെ സന്നദ്ധസംഘടനയായ കാരിത്താസിന്റെ ഇറ്റലിയിലെ ശാഖ പുതിയ പദ്ധതികളുമായി എത്തുന്നു. സൂപെർ (S.U.P.E.R – Support Ukrainian Population for the Emergency and Rehabilitation) എന്നപേരിലെത്തുന്ന ഈ പദ്ധതിയിലൂടെ 17 കോടി 30 ലക്ഷത്തോളം രൂപയാണ് ഉക്രൈനിലെ ജനങ്ങൾക്കായി മാറ്റിവയ്ക്കുന്നത്.
വികസന സഹകരണത്തിനായുള്ള ഇറ്റാലിയൻ വിഭാഗത്തിന്റെ സാമ്പത്തികസഹായം ഇറ്റാലിയൻ കാരിത്താസ് നടപ്പാക്കുന്ന ഈ പദ്ധതിക്കുണ്ട്. കൂടാതെ, സലേഷ്യൻ സന്യാസ സമൂഹം, കാരിത്താസ് സ്പേസ് സംഘടന, ഉക്രൈൻ കാരിത്താസ്, ഉക്രൈനിലെ പൊൾത്താവ്, കമിയാൻസ്കെ, ഖാർക്കിവ് എന്നിവിടങ്ങളിലെ പ്രാദേശിക കാരിത്താസ് സംഘടനകളും ഈ പദ്ധതിയിൽ കൈകോർക്കുന്നു.
റഷ്യ ഉക്രൈനുനേർക്കു നടത്തുന്ന ആക്രമണംമൂലം പതിനായിരങ്ങളാണ് പലായനത്തിനു നിർബന്ധിതരായിരിക്കുന്നത്. ഭക്ഷണം, ജലം, ഔഷധങ്ങൾ, അടിസ്ഥാനസൗകര്യങ്ങൾ എന്നിവയുടെ അഭാവം രൂക്ഷമാണ്. അന്നാട്ടിൽ മാനവജീവിതം ദുരിതപൂർണ്ണമായിരിക്കയാണ്. ഈയൊരു പശ്ചാത്തലത്തിലാണ് ഇറ്റലിയിലെ കാരിത്താസ് സംഘടന ‘സൂപെർ’ പദ്ധതിയുമായി രംഗത്തെത്തിയിരിക്കുന്നത്.
