വടക്കൻ നൈജീരിയയിൽ പുതുതായി രൂപംകൊണ്ട ‘ലക്കുറവ’ എന്ന ഇസ്ലാമിക ഭീകരസംഘടന വീണ്ടും ആക്രമണങ്ങൾ നടത്തുന്നു. ഏറ്റവും പുതിയ ആക്രമണത്തിൽ കെബ്ബി സംസ്ഥാനത്തിലെ അരേവ കൗണ്ടിയിലെ ഗുംകി ഗ്രാമത്തിലെ ഒരു നിർമാണസ്ഥലത്ത് ലക്കുറവ ഭീകരർ അതിക്രമിച്ചുകയറി.
ഭീകരരുടെ ആക്രമണത്തിൽ ഒരു പ്രമുഖ ടെലികമ്മ്യൂണിക്കേഷൻ സ്ഥാപനത്തിൽ ജോലിചെയ്തിരുന്ന മൂന്ന് ക്രിസ്ത്യാനികൾ കൊല്ലപ്പെട്ടു. ആക്രമണം നടക്കുമ്പോൾ ഇവർ നൈജീരിയ ഇമിഗ്രേഷൻ സേവനത്തിനായി ഒരു നിരീക്ഷണ മാസ്റ്റ് സ്ഥാപിക്കുകയായിരുന്നു. കൊല്ലപ്പെട്ടവർ ആരാണെന്നത് സംബന്ധിച്ച് പരസ്പരവിരുദ്ധമായ റിപ്പോർട്ടുകളാണ് പുറത്തുവരുന്നത്. പൊലീസ് റിപ്പോർട്ടുകൾ അവരെ എയർടെല്ലിലെ ജീവനക്കാരാണെന്നു പറയുമ്പോൾ പ്രാദേശിക സ്രോതസ്സുകൾ നൈജീരിയ ഇമിഗ്രേഷൻ സർവീസിലെ ജീവനക്കാരാണെന്ന് പറയുന്നു. മരിച്ചവരിൽ മൂന്നുപേർ ഇമിഗ്രേഷൻ റോളുകളിൽ സേവനമനുഷ്ഠിക്കുന്ന ക്രിസ്ത്യാനികളാണ് എന്ന് സർ യഹായ സ്പെഷ്യലിസ്റ്റ് ആശുപത്രിയിലെ മെഡിക്കൽ ഉദ്യോഗസ്ഥർ സ്ഥിരീകരിച്ചു.
മൂന്ന് എയർടെൽ ജീവനക്കാരും ഒരു താമസക്കാരനും ഉൾപ്പെടെ നാലുപേർ ആക്രമണത്തിൽ കൊല്ലപ്പെട്ടതായി കെബ്ബി സ്റ്റേറ്റ് പൊലീസ് പബ്ലിക് റിലേഷൻസ് ഓഫീസർ എസ്പി നഫിയു അബൂബക്കർ പറഞ്ഞു. ആക്രമണത്തെ തുടർന്ന് പൊലീസ് കമ്മീഷണർ കൂടുതൽ ടീമുകളെ പ്രദേശത്ത് വിന്യസിച്ചു. വർധിച്ചുവരുന്ന അക്രമത്തെ ചെറുക്കുന്നതിന് സമയബന്ധിതമായ വിവരങ്ങൾ നൽകിക്കൊണ്ട് സുരക്ഷാ ഏജൻസികളെ സഹായിക്കണമെന്ന് ആവശ്യപ്പെട്ട് പൊലീസ് കമ്മീഷണർ പ്രാദേശിക കമ്മ്യൂണിറ്റി അംഗങ്ങളുമായും കൂടിക്കാഴ്ച നടത്തി.
രാജ്യാന്തരബന്ധങ്ങളുള്ള അത്യാധുനിക ഭീകരശൃംഖലയാണ് ലക്കുറവ. സഹേൽ മുതൽ ഘാന തീരം വരെ നീളുന്ന ഒരു ഇസ്ലാമിക ഖിലാഫത്ത് സ്ഥാപിക്കുക എന്നതാണ് അവരുടെ ലക്ഷ്യം. ഈ ദൗത്യം പ്രാദേശിക സ്ഥിരതയ്ക്കും ക്രൈസ്തവസമൂഹങ്ങളുടെ നിലനിൽപ്പിനും കാര്യമായ ഭീഷണി ഉയർത്തുന്ന ഒന്നാണ്.
