“ലോകം മുഴുവൻ നിങ്ങളോടൊപ്പമുണ്ട്” എന്ന് ക്രൈസ്തവരെ ഓർമപ്പെടുത്തി ഗാസയിലെ ഹോളി ഫാമിലി ഇടവക സന്ദർശിച്ച ജറുസലേം പാത്രിയർക്കീസ് കർദിനാൾ പിയർബാറ്റിസ്റ്റ പിസബല്ല. 14 മാസത്തിലേറെയായി ഇടവകവളപ്പിൽ അഭയം പ്രാപിച്ച ഗാസ മുനമ്പിലെ ക്രിസ്ത്യൻസമൂഹത്തെ സന്ദർശിച്ചു സംസാരിക്കുകയായിരുന്നു അദ്ദേഹം.
ഒരുദിവസമെങ്കിലും സമാധാനത്തിന്റെയും സന്തോഷത്തിന്റെയും അന്തരീക്ഷത്തിൽ തങ്ങളുടെ ഇടയനൊപ്പം ക്രിസ്തുമസ് ആഘോഷിക്കാൻ കഴിയുമെന്നു പ്രതീക്ഷിച്ച വിശ്വാസികൾ കർദിനാളിന്റെ ഈ സന്ദർശനം ആകാംക്ഷയോടെ കാത്തിരിക്കുകയായിരുന്നു. ഇത് രണ്ടാം തവണയാണ് കർദിനാൾ പിസബല്ല ഗാസയിൽ എത്തുന്നതും ഇടവക വികാരി ഫാ. ഗബ്രിയേൽ റൊമാനെല്ലിയുമായി കൂടിക്കാഴ്ച നടത്തുന്നതും. കഴിഞ്ഞ മെയ് 16 നും കർദിനാൾ പിസബല്ല സന്ദർശനം നടത്തിയിരുന്നു.
ഗാസ സന്ദർശനത്തിനുശേഷം, ക്രിസ്തുമസ് രാത്രിയിൽ പാത്രിയർക്കീസ് ബെത്‌ലഹേമിലേക്കും സന്ദർശനം നടത്തും. അവിടെയും പീഡിപ്പിക്കപ്പെടുന്ന ഒരു ക്രൈസ്തവസമൂഹത്തെയാണ് കർദിനാൾ സന്ദർശിക്കുന്നത്. പിന്നീട് സെന്റ് കാതറിൻ ദൈവാലയത്തിൽ പാതിരാകുർബാനയും അർപ്പിക്കും.
