ലോകത്തിൽ ആദ്യമായി 16 വയസ്സിനു താഴെയുള്ള കുട്ടികളെ സാമൂഹ്യമാധ്യമങ്ങളിൽനിന്നും വിലക്കുന്ന നിയമം കൊണ്ടുവരാനൊരുങ്ങുകയാണ് ഓസ്‌ട്രേലിയ. ഇതുമായി ബന്ധപ്പെട്ട ബില്ലുകൾ അടുത്തയാഴ്ച നടക്കുന്ന പാർലമെന്റിൽ അവതരിപ്പിക്കും. സോഷ്യൽ മീഡിയ ഓസ്ട്രേലിയൻ കുട്ടികൾക്കു വരുത്തുന്ന ‘ദോഷം’ ലഘൂകരിക്കുക എന്ന ലക്ഷ്യത്തോടെയാണ് ഈ നടപടി എന്ന് പ്രധാനമന്ത്രി ആന്റണി അൽബനീസ് പറഞ്ഞു.
“ഇത് അമ്മമാർക്കും അച്ഛന്മാർക്കും വേണ്ടിയുള്ളതാണ്. എന്നെപ്പോലെ അവരും ഓൺലൈനിൽ നമ്മുടെ കുട്ടികളുടെ സുരക്ഷയെക്കുറിച്ച് ആശങ്കാകുലരാണ്. സർക്കാരിന് നിങ്ങളുടെ പിന്തുണയുണ്ടെന്ന് ഓസ്ട്രേലിയൻ കുടുംബങ്ങൾ അറിയണമെന്ന് ഞാൻ ആഗ്രഹിക്കുന്നു” – അദ്ദേഹം കൂട്ടിച്ചേർത്തു.
എന്നാൽ, യുവാക്കൾക്ക് ഈ നിയമം ബാധകമല്ല എന്നും അദ്ദേഹം വ്യക്തമാക്കി. മാതാപിതാക്കളുടെ സമ്മതത്തോടെ കുട്ടികൾക്ക് സാമൂഹ്യമാധ്യമങ്ങളിൽ പ്രവേശിക്കുന്നതിനും പ്രായപരിധിയിൽ ഇളവ് ഉണ്ടാകില്ല. പ്രവേശനം തടയാൻ ന്യായമായ നടപടികൾ കൈക്കൊള്ളുന്നുവെന്ന് കാണിക്കാനുള്ള ഉത്തരവാദിത്തം സോഷ്യൽ മീഡിയ പ്ലാറ്റ്ഫോമുകളിലായിരിക്കുമെന്ന് സർക്കാർ പറയുന്നു. ഉപയോക്താക്കൾക്ക് പിഴ ഈടാക്കില്ലെന്നും നിയമങ്ങൾ നടപ്പാക്കേണ്ടത് ഓസ്ട്രേലിയയുടെ ഓൺലൈൻ റെഗുലേറ്ററായ ഇ-സേഫ്റ്റി കമ്മീഷണറാണെന്നും അൽബനീസ് പറഞ്ഞു.
നിയമനിർമാണം പാസാക്കി 12 മാസത്തിനുശേഷം പ്രാബല്യത്തിൽ വരികയും അത് പ്രാബല്യത്തിൽ വന്നതിനുശേഷം അവലോകനത്തിനു വിധേയമാക്കുകയും ചെയ്യും.
