യുദ്ധം തകര്‍ത്ത സുഡാനിലെ സ്ത്രീകളുടെ ജീവിതം നരകതുല്യമെന്ന് റിപ്പോര്‍ട്ട്. കുടുംബത്തിലേക്കു ഭക്ഷണമെത്തിക്കാന്‍ പട്ടാളക്കാരുമായി ലൈംഗികബന്ധത്തിലേര്‍പ്പെടാന്‍ നിര്‍ബന്ധിതരായിരിക്കുകയാണ് സുഡാനിലെ സ്ത്രീകള്‍. ദ ഗാര്‍ഡിയന്‍ ആണ് ഈ റിപ്പോര്‍ട്ട് പുറത്തുവിട്ടിരിക്കുന്നത്. സുഡാനിലെ ഒംദുര്‍മാന്‍ നഗരത്തില്‍നിന്ന് പലായനം ചെയ്ത സ്ത്രീകളാണ് ഇക്കാര്യം വെളിപ്പെടുത്തിയതെന്ന് ഗാര്‍ഡിയന്‍ റിപ്പോര്‍ട്ടില്‍ പറയുന്നു.
സുഡാനില്‍ ആഭ്യന്തരയുദ്ധം പൊട്ടിപ്പുറപ്പെട്ടതോടെയാണ് സ്ത്രീകള്‍ക്കു നേരെയുള്ള അതിക്രമങ്ങളും വര്‍ധിച്ചത്. യുദ്ധം ആരംഭിച്ച് ദിവസങ്ങള്‍ക്കുപിന്നാലെ പട്ടാളക്കാര്‍ സ്ത്രീകളെ ക്രൂരമായി ആക്രമിക്കുന്നതിന്റെ റിപ്പോര്‍ട്ടുകള്‍ പുറത്തുവന്നിരുന്നു.
ഭക്ഷണം ശേഖരിച്ചുവച്ചിരിക്കുന്ന ഫാക്ടറികളില്‍ വച്ചാണ് പട്ടാളക്കാരുമായി ലൈംഗികബന്ധത്തിൽ ഏര്‍പ്പെടേണ്ടിവന്നിരുന്നതെന്ന് സ്ത്രീകള്‍ പറഞ്ഞു. “എന്റെ രക്ഷിതാക്കള്‍ക്കു പ്രായമായി. ഭക്ഷണം തേടിപ്പോകാന്‍ എന്റെ മകളെ ഞാന്‍ അനുവദിക്കില്ല. ഞാന്‍ പട്ടാളക്കാരുടെ അടുത്തേക്കു പോയിരുന്നു. ഭക്ഷണം ലഭിക്കാന്‍ അതുമാത്രമാണ് വഴി” – മീറ്റ് പ്രോസസിംഗ് ഫാക്ടറിയില്‍വച്ച് ലൈംഗികാതിക്രമം നേരിടേണ്ടിവന്ന സ്ത്രീ പറഞ്ഞു.
തങ്ങളുടെ അധീനതയിലുള്ള സ്ഥലങ്ങളില്‍വച്ച് പട്ടാളക്കാര്‍ സ്ത്രീകളെ ലൈംഗികാതിക്രമം ചെയ്യുന്നതിന്റെ റിപ്പോര്‍ട്ടുകള്‍ നേരത്തെ പുറത്തുവന്നിരുന്നു. പല സ്ത്രീകളും തങ്ങള്‍ നേരിടേണ്ടിവന്ന ലൈംഗികാതിക്രമത്തെക്കുറിച്ചു തുറന്നുപറയാന്‍ മുന്നോട്ടുവന്നിരുന്നു.
അനാഥമായ വീടുകളില്‍ക്കയറി ഭക്ഷണം ശേഖരിക്കുന്നതിനുപകരമായി തങ്ങളോടൊപ്പം ലൈംഗികബന്ധത്തിലേര്‍പ്പെടണമെന്നാണ് പട്ടാളക്കാര്‍ പറയുന്നതെന്ന് സ്ത്രീകള്‍ പറഞ്ഞു. ഉപേക്ഷിക്കപ്പെട്ട വീടുകളില്‍നിന്നു ലഭിക്കുന്ന സാധനങ്ങള്‍ പ്രാദേശിക വിപണിയില്‍ വിറ്റ് പണം കണ്ടെത്താനാണ് പല സ്ത്രീകളും ഇത്തരം വീടുകളില്‍ പ്രവേശിക്കാന്‍ ശ്രമിക്കുന്നത്. ഈ സാഹചര്യവും സൈന്യം മുതലെടുക്കുകയാണെന്ന് സ്ത്രീകള്‍ പറയുന്നു. ഇത്തരത്തില്‍ പട്ടാളക്കാരുമായി ലൈംഗികബന്ധത്തിലേര്‍പ്പെട്ടതിനു ശേഷമാണ് ആളൊഴിഞ്ഞ ഒരു വീട്ടില്‍നിന്നും അടുക്കളവസ്തുക്കളും ഭക്ഷണവും എടുക്കാന്‍ തനിക്ക് കഴിഞ്ഞതെന്ന് ഒരു സ്ത്രീ വെളിപ്പെടുത്തി.
“വല്ലാത്ത അവസ്ഥയിലൂടെയാണ് ഞാന്‍ കടന്നുപോയത്. ശത്രുക്കള്‍ക്കുപോലും ഈ അവസ്ഥ വരരുതെന്നാണ് പ്രാർഥിക്കുന്നത്. എന്റെ കുട്ടികള്‍ പട്ടിണിയാകാതിരിക്കാനാണ് ഭക്ഷണം തേടിപോയത്” – ഒരു സ്ത്രീ പറഞ്ഞു.
എന്നാല്‍, പട്ടാളക്കാരുമായി ലൈംഗികബന്ധത്തിലേര്‍പ്പെടാന്‍ വിസമ്മതിച്ചതിന് ക്രൂരപീഡനം നേരിടേണ്ടിവന്നുവെന്ന് മറ്റൊരു സ്ത്രീ ദി ഗാര്‍ഡിയനോടു പറഞ്ഞു. സൈന്യം തന്നെ ക്രൂരമായി മര്‍ദിച്ചെന്നും കാലില്‍ പൊള്ളലേല്‍പ്പിച്ചുവെന്നും ഈ സ്ത്രീ പറഞ്ഞു.
