“നമ്മുടെ അതിക്രമങ്ങള്‍ക്കുവേണ്ടി അവന്‍ മുറിവേല്‍പിക്കപ്പെട്ടു. നമ്മുടെ അകൃത്യങ്ങള്‍ക്കുവേണ്ടി ക്ഷതമേല്‍പിക്കപ്പെട്ടു. അവന്റെമേലുള്ള ശിക്ഷ നമുക്ക് രക്ഷ നല്‍കി; അവന്റെ ക്ഷതങ്ങളാല്‍ നാം സൗഖ്യം പ്രാപിച്ചു” (ഏശയ്യാ 53:5).
പിതാവ് പുത്രനെ നൽകി ലോകത്തെ സ്നേഹിച്ചു. ക്രിസ്തു സ്വന്തജീവൻ നൽകി മനുഷ്യകുലത്തെ സ്നേഹിച്ചു. പീലാത്തോസിന്റെ പ്രത്തോറിയത്തിനുള്ളിൽ
ചാട്ടവാറടികളാൽ അവന്റെ പുറം തകർന്നപ്പോൾ, അടിപ്പിണരുകളാൽ അവന്റെ ശരീരത്തിൽ ഉഴവുചാലുകൾ കീറിയപ്പോഴും അസ്ഥിക്കഷണങ്ങളും ഈയക്കട്ടകളും കൊണ്ട് കെട്ടിയുണ്ടാക്കിയ ചാട്ടകൊണ്ട് പടയാളികളിൽ നിന്ന് മത്സരിച്ചുള്ള പ്രഹരം ഏൽക്കുമ്പോൾ നിശ്ശബ്ദനായി ആ സഹനങ്ങളെ അവൻ ഏറ്റെടുത്തത് നമ്മോടുള്ള സ്നേഹത്തെപ്രതിയായിരുന്നു.
പടയാളികൾ മുഖത്ത് കാർക്കിച്ചുതുപ്പിയപ്പോൾ ആ അപമാനഭാരത്തെ അവൻ സഹിച്ചതും നമ്മോടുള്ള സ്നേഹത്തിന്റെ വെളിപ്പെടുത്തലായിരുന്നു. മുൾക്കിരീടം അവന്റെ ശിരസ്സിൽ അവർ വച്ചുകൊടുക്കുമ്പോൾ അത് അവന്റെ ചർമ്മത്തെയും മാംസത്തെയും തുളച്ച് അസ്ഥിയോളം മുള്ളുകൾ ആഴ്ന്നപ്പോൾ, ആ കഠോരവേദനയിലും ശാന്തതയോടെ സഹിച്ചത് നമ്മുടെ പാപങ്ങൾക്ക് പരിഹാരം ചെയ്യാനായിരുന്നു.
ഭാരമേറിയ കുരിശ് ചുമന്നുകൊണ്ട് കാൽവരി കയറുമ്പോൾ പലയാവർത്തി മുഖമടിച്ചുവീണ് അവന്റെ ശരീരം തകർന്നപ്പോൾ അവൻ ആഗ്രഹിച്ചത് ആ സ്നേഹം ഞാനൊന്നു മനസ്സിലാക്കിയിരുന്നുവെങ്കിൽ എന്നാണ്. ശിരസ്സിൽ മുൾമുടി ആഴ്ന്നിറങ്ങിയപ്പോഴും ചാട്ടവാറടിയിലും ഇരുമ്പാണി തുളച്ചുകയറിയതിലും ചിന്നിച്ചിതറിയ ചോരകൊണ്ട് അവൻ നഗ്നത മറച്ചപ്പോൾ ഇന്ന് നീയും ഞാനും പാപത്തിന്റെ ലജ്ജാഭാരം ഇല്ലാതെ ദൈവസന്നിധിയിൽ നിൽക്കുന്നത് അവന്റെ രക്തത്തെ ഉടയാടയാക്കിയാണ് എന്ന് തിരിച്ചറിയുക.
അന്ന് ഏദനിൽ ആദിമാതാപിതാക്കളുടെ പാപം മൂലമുണ്ടായ നഗ്നതയെ തോലുകൊണ്ട് മറച്ച ദൈവം ഇന്ന് സ്വപുത്രൻെറ രക്തത്താൽ മനുഷ്യകുലത്തിന്റെ പാപനഗ്നത മറച്ചു. നിന്റെ മുറിവുകൾ എന്നും മറ്റുള്ളവർക്ക് സൗഖ്യം നൽകാനുള്ള തിരുമുറിവുകളാക്കി മാറ്റണം. സമാനമായൊരു മുറിവ് വേറൊരാൾക്കു നൽകുകയില്ലെന്ന സ്നേഹശാഠ്യം നിന്നിലുണ്ടാകണം. അപ്പോൾ നിന്റെ മാത്രമല്ല, നിന്റെ ചുറ്റുമുള്ളവരുടെ ജീവിതം കൂടി പ്രകാശപൂർണ്ണമാകും.
അവന്റെ ക്ഷതങ്ങൾ മാത്രമല്ല, നിന്റെറ ക്ഷതങ്ങളും സൗഖ്യദായകമാണ്. രണ്ടായിരം വർഷങ്ങൾക്കു മുൻപ് ക്രിസ്തു സഹിച്ച പീഡകളും കുരിശുമരണവും എന്റെയും നിന്റെയും നിത്യരക്ഷയ്ക്കു വേണ്ടിയായിരുന്നു എന്നത് ഒരു കെട്ടുകഥയല്ല എന്നു വിശ്വസിക്കാൻ, ഉയിരേകിയവന്റെ ഉടലിലെ ഉഴവുചാലുകൾ നിന്റെ ഉശ്വാസനിശ്വാസങ്ങൾക്ക് ഉണർവാകട്ടെ.
ജിൻസി സന്തോഷ്
