പാതിരാക്കോഴി കൂവിയുണർത്തിയ ഒരുക്കദിനത്തിന്റെ പുലരിയിൽ വെറുമൊരു ദാസിപ്പെണ്ണിന്റെ ചോദ്യത്തിനു മുൻപിൽ ക്രിസ്തുവിനെ മൂന്നാവർത്തി തള്ളിപ്പറഞ്ഞ പത്രോസ് അപരാധഭാരത്താൽ മനംനൊന്ത് ഓടിയെത്തിയത് അമ്മമറിയത്തിനരികിൽ. മനുഷ്യരുടെ പാപത്തിനു പരിഹാരമായി പ്രഹരങ്ങളും പരിഹാസവുമേറ്റ് തന്റെ പ്രിയമകൻ പ്രാണവേദനയാൽ പിടയുമ്പോൾ പ്രത്തോറിയത്തിനു വെളിയിൽ കാൽവരിയിലേക്കുള്ള സഹന ദുരിതയാത്രയുടെ
തയ്യാറെടുപ്പ് നടക്കുന്നു.
മൂന്നാണ്ട് നിഴൽപോലെ കൂടെനടന്ന, സഭയെ നയിക്കാൻ പാറപോലെ ചങ്കുറപ്പുള്ളവൻ വെറുമൊരു ദാസിപ്പെണ്ണിന്റെ ചോദ്യത്തിനുമുൻപിൽ തന്റെ മകനെ മൂന്നാവർത്തി തള്ളിപ്പറഞ്ഞപ്പോൾ, ചെയ്ത അപരാധത്തെ മറന്ന് പത്രോസിനെ തന്റെ ചങ്കോടു ചേർത്തുപിടിച്ച മറിയം.
ആരെയും ഒരുനാളും തള്ളിക്കളയാനാവില്ലെന്ന സ്നേഹമന്ത്രവുമായി സഹനവേനലിൽ പൊരിഞ്ഞൊരമ്മ. എല്ലാവരും നിന്നെ തള്ളിക്കളഞ്ഞാലും ഞാൻ നിന്നെ തള്ളിക്കളയുകയില്ലെന്നു പറയാനുള്ള കൃപയുടെ നിറവ്. എന്റെ മകനെ തള്ളിപ്പറഞ്ഞവനെ ഞാനും തള്ളിക്കളയുന്നു എന്ന മാനുഷിക നിലപാട് തിരുത്തി,
തള്ളുന്നവനെ ഉള്ളിൽ കൊള്ളാനുള്ള അമ്മമറിയത്തിന്റെ സ്നേഹഭാവം.
ജീവിതയാതനകളുടെ കാൽവരി കയറാൻ തന്നോടൊപ്പം പദയാത്രയിൽ പങ്കുകൊള്ളാൻ ഒരുക്കമുള്ളവരെ കണ്ടെത്താൻ കൊതിക്കുന്ന മാതൃഹൃദയം നമ്മോടു മന്ത്രിക്കുന്നതിതാണ് – “പാപത്തിനെതിരായിട്ടുള്ള സമരത്തിൽ നിങ്ങൾക്കിനിയും രക്തം ചൊരിയേണ്ടിവന്നിട്ടില്ല” (ഹെബ്രാ. 11:4).
കുറ്റബോധം ഒരു തടവറയാണ്. പ്രത്യാശയുടെ വെളിച്ചം കടക്കാത്ത തടവറ. അതിൽനിന്നും കരകയറാൻ ക്രിസ്തുവിന്റെ മഹത്വമേറിയ പ്രകാശം തന്നെ വേണം. കുറ്റബോധം ഒരു വ്യക്തിയുടെ ആത്മവിശ്വാസത്തെ തകർത്തുകളയും. ജീവിതത്തിലെ നിർണ്ണായക ചുവടുകൾക്കായി ഒരുങ്ങുമ്പോഴെല്ലാം കഴിഞ്ഞകാല വീഴ്ച്ചകളും പരാജയങ്ങളും മനസ്സിൽ തെളിയും.
വാക്ക് പാലിക്കാതെ പോയത്, വിശുദ്ധി നഷ്ടമാക്കിയത്, തള്ളിപ്പറഞ്ഞത്, ഒറ്റുകൊടുത്തത്, വാക്കുപാലിക്കാതെ നീ എങ്ങനെ വചനം പറയും. വിശുദ്ധി നഷ്ടപ്പെടുത്തിയ നീ എങ്ങനെ പരിശുദ്ധനായി ജീവിക്കും. തള്ളിപ്പറഞ്ഞവന് എങ്ങനെ ചേർത്തുപിടിക്കാൻ കഴിയും. ഒരിക്കലും ഓർമ്മിക്കാൻ ആഗ്രഹിക്കാത്ത സ്വപ്രവൃത്തികളിലേക്കും കുറവുകളിലേക്കും നോക്കി നീ ഭാരപ്പെടും. കാലത്തെ പഴിച്ചും വീഴ്ച്ചയെ ശപിച്ചും കാലം തള്ളിനീക്കുന്നത് എന്തിന്.
അതിജീവിക്കാൻ ശ്രമിക്കുമ്പോഴും നീ വീഴുന്നുണ്ട്. എങ്കിലും നിരാശ വേണ്ട. അതിക്രമങ്ങൾ തോളിലേറ്റാൻ ക്രിസ്തു കൂടെയുള്ളപ്പോൾ കുറ്റബോധത്തിന്റെ ഭാരത്താൽ നീ തല താഴ്ത്തരുത്. നിത്യവെളിച്ചമായവന്റെ പ്രകാശത്തിൽ പുറത്തുകടക്കുക. തടവറ ഭേദിക്കുക. വീണ്ടെടുക്കാനാവാത്ത വിധം നീ ഇനിയും വീണുപോയിട്ടില്ല. “അതിക്രമങ്ങൾക്കു മാപ്പും പാപങ്ങൾക്കു മോചനവും ലഭിച്ചവൻ ഭാഗ്യവാൻ” (സങ്കീ. 32:1).
ജിൻസി സന്തോഷ്
