“അവന്‍ കവാടത്തിലേക്കു പോയപ്പോള്‍ മറ്റൊരു പരിചാരിക അവനെ കണ്ടു. അവള്‍ അടുത്തുനിന്നവരോടു പറഞ്ഞു: ഈ മനുഷ്യനും നസറായനായ യേശുവിന്റെ കൂടെയായിരുന്നു. ഞാന്‍ അവനെ അറിയുകയില്ല എന്ന്‌ അവന്‍ വീണ്ടും ആണയിട്ടു നിഷേധിച്ചു” (മത്തായി 26: 71-72).
തീകൂട്ടി വട്ടമിട്ടിരുന്ന ദൈവനിഷേധികളുടെ പന്തിയിൽ ഇത്തിരി സുഖത്തിന്റെ ചൂടുതേടി പത്രോസ് പോയി ഇരുന്നപ്പോൾ അവനും ദൈവനിഷേധിയായി മാറി. “മരിക്കേണ്ടിവന്നാലും ഞാൻ നിന്നെ തള്ളിപ്പറയില്ല” എന്നുപറഞ്ഞ പത്രോസ്, ആ രാത്രി പുലരുംമുൻപേ ഗുരുവിനെ മൂന്നുതവണ തള്ളിപ്പറഞ്ഞു.
ഒരു കനൽചൂടിൽ ജീവിതദൗത്യത്തിന്റെ താളം പിഴച്ച പത്രോസ്, വെറുമൊരു ദാസിപ്പെണ്ണിന്റെ ചോദ്യങ്ങൾക്കുമുൻപിൽ ദൈവപുത്രനെ തള്ളിപ്പറഞ്ഞവൻ, മൂന്നാണ്ട് കൂടെനടന്ന് പ്രാണനുതുല്യം സ്നേഹിച്ചിട്ടും തിരുരക്ത-ശരീരങ്ങൾ പകുത്തുനൽകിയിട്ടും ഗുരു പ്രാണവേദനയിൽ രക്തം വിയർത്തു പ്രാർഥിക്കുമ്പോൾപോലും നിദ്രയുടെ ആലസ്യത്തിലേക്കു വഴുതിവീണ ശിഷ്യരിൽ പ്രമുഖൻ. അസൂയ നിറഞ്ഞ സാവൂളിന്റെയും ആസക്തി നിറഞ്ഞ ദാവീദിന്റെയും ദൈവാലയം പണിത കൈകൾ കൊണ്ടുതന്നെ വിഗ്രഹാലയം പണിത സോളമന്റെയും ദൈവകൃപ ചോർന്ന വഴികളെ ദൈവാത്മാവ് തിരുവെഴുത്തുകളുടെ താളുകളിൽ വ്യക്തമായി വിശ്വാസികൾക്കു മുൻപിൽ തുറന്നുകാട്ടുന്നു.
നല്ല കള്ളൻ ക്രൂശിലേറ്റത്തക്ക കുറ്റവാളിയായിരുന്നെങ്കിലും ഒരൊറ്റ വാക്കു കൊണ്ട് നീതികരിക്കപ്പെട്ടു. യൂദാസ് അപ്പസ്തോലൻമാർക്കൊപ്പം എണ്ണപ്പെട്ടവനായിരുന്നെങ്കിലും ഒറ്റരാത്രി കൊണ്ട് അവന്റെ അധ്വാനമെല്ലാം വെറുതെയായി.
വല്ലാത്ത ശക്തിയുണ്ട് പ്രലോഭനങ്ങൾക്ക്. ഒരു നശീകരണ ശക്തി, ഒരു നിമിഷം തന്നെ ധാരാളം ജീവിതവും സ്വപ്നങ്ങളും കീഴ്മേൽ മറിയാൻ. ഇത് തിരിച്ചറിഞ്ഞിട്ടാവാം, ഒന്നു കുമ്പിട്ടാരാധിച്ചാൽ എല്ലാം നിനക്കു സ്വന്തം എന്ന പ്രലോഭനത്തിന്റെ മുൻപിൽ ക്രിസ്തു തികഞ്ഞ ജാഗ്രതയോടെയാണ് പ്രതികരിച്ചത്.
ദൈവമേ, ഏതു വഴിത്താരകളിലാണ് എന്റെ പാദങ്ങൾക്ക് ഭ്രംശനം സംഭവിക്കുന്നത്. ഏതു യാമങ്ങളിലാണ് എന്റെ ചിന്തകൾ ഇടറുന്നത്. അതിനാൽ ആരും സ്വന്തം നന്മകളെപ്രതി ഊറ്റം കൊള്ളാതിരിക്കട്ടെ. എന്തെന്നാൽ, തന്നിൽ തന്നെ ആശ്രയം വയ്ക്കുന്നവൻ വീണുപോകും. ഉയരം കൂടുന്തോറും വീഴ്ച്ചയുടെ ആഘാതവും ഏറിവരും. “ആകയാൽ നിൽക്കുന്നു എന്നു കരുതുന്നവൻ വീഴാതിരിക്കാൻ സൂക്ഷിച്ചുകൊള്ളട്ടെ” (1 കോറി 10:12).
ജിൻസി സന്തോഷ്
