കിഴങ്ങുവർഗങ്ങളിൽ രാജാവാണ് മധുരക്കിഴങ്ങ്. ഇത് ലോകത്തിലെ ഏറ്റവും പ്രധാനപ്പെട്ട ഏഴാമത്തെ ഭക്ഷ്യവിളയും അഞ്ചാമത്തെ അവശ്യവിളയുമാണ്. ഉഷ്ണമേഖലാപ്രദേശങ്ങളിലെ ആളുകൾക്ക് ഇത് പ്രധാനഭക്ഷണങ്ങളിൽ ഒന്നാണ്. പ്രകൃതിദുരന്തങ്ങളുടെ സമയത്ത് ഭക്ഷ്യക്ഷാമം കുറയ്ക്കുന്നതിൽ മധുരക്കിഴങ്ങ് വലിയ സ്ഥാനം വഹിക്കുന്നുണ്ട്. ഉഷ്ണമേഖലാ പ്രദേശങ്ങളിലെ ഒരു പ്രധാന കിഴങ്ങുവർഗമാണിത്. അതോടൊപ്പം ഗണ്യമായ പോഷകഗുണങ്ങളും ഇതിലടങ്ങിയിട്ടുണ്ട്. നിരവധി ഗുണങ്ങളും പോഷകമൂല്യങ്ങളുമടങ്ങിയ മധുരക്കിഴങ്ങിനെക്കുറിച്ച് കൂടുതൽ അറിയാം.
മധുരക്കിഴങ്ങിന്റെ ഗുണങ്ങൾ
ഒരു സൂപ്പർ ഫുഡ് എന്ന ലേബൽ സ്വന്തമാക്കിയ മധുരക്കിഴങ്ങിൽ ആരോഗ്യത്തിന് ഗുണം ചെയ്യുന്ന ചില കാര്യങ്ങൾ അടങ്ങിയിട്ടുണ്ട്. ഇതാ അതിൽ ചിലത്.
രക്തത്തിലെ ഗ്ലൂക്കോസിനെ നിയന്ത്രിക്കുന്നു
സ്വാഭാവികമായി മധുരമുള്ള രുചിയുണ്ടെങ്കിലും പ്രമേഹരോഗികൾക്ക് ഇത് തൊടാൻപോലും പാടില്ല എന്ന പേടി വേണ്ട. മധുരമുണ്ടെങ്കിലും ഗ്ലൈസെമിക് സൂചിക കുറവായതിനാൽ പ്രമേഹരോഗികൾക്കു പോലും മധുരക്കിഴങ്ങ് കഴിക്കാം. അതായത്, അവ രക്തത്തിലേക്ക് ഗ്ലൂക്കോസ് സാവധാനത്തിൽ മാത്രമേ കടത്തിവിടുന്നുള്ളൂ. അതുകൊണ്ടുതന്നെ ഇത് ഗ്ലൂക്കോസിന്റെ അളവ് പെട്ടെന്ന് ഉയരുന്നത് തടയുന്നു. കൂടാതെ, ഈ ഗുണം ദഹനത്തെ പതുക്കെയാക്കി ദീർഘനേരം വയറു നിറഞ്ഞതായി തോന്നുന്നതിനും ഇതിലൂടെ വിശപ്പ് നിയന്ത്രിക്കുന്നതിനും കാരണമാകുന്നു.
കുടലിന്റെ ആരോഗ്യം മെച്ചപ്പെടുത്തുന്നു
മധുരക്കിഴങ്ങിൽ നാരുകൾ ധാരാളമുണ്ട്. ഉയർന്ന നാരുകളുടെ അളവ് ദഹനത്തെ മെച്ചപ്പെടുത്തുകയും മലവിസർജനം പതിവായി ഉറപ്പാക്കുകയും മലബന്ധം തടയുകയും ചെയ്യുന്നു. കൂടാതെ, നാരുകൾ ആരോഗ്യകരമായ ഒരു കുടൽ മൈക്രോബയോമിനെ പിന്തുണയ്ക്കുന്നു.
രോഗപ്രതിരോധശേഷി വർധിപ്പിക്കുന്നു
മധുരക്കിഴങ്ങിൽ ഉയർന്ന അളവിൽ വിറ്റാമിൻ എ അടങ്ങിയിട്ടുണ്ട്. ഇത് രോഗപ്രതിരോധശേഷിയെ ഉത്തേജിപ്പിക്കാൻ സഹായിക്കും. കുടലിന്റെ ആരോഗ്യം മെച്ചപ്പെടുത്തുന്നതിനും ഈ ഗുണം സഹായിക്കുന്നു. ഇത് കുടലിലേക്ക് രോഗകാരികളെ അകറ്റിനിർത്താനോ, തടയാനോ സഹായിക്കുന്നു. അങ്ങനെ, അണുബാധകളെ ഫലപ്രദമായി ചെറുക്കാൻ ശരീരത്തെ സഹായിക്കുന്നതിലൂടെ പ്രതിരോധശേഷി പ്രോത്സാഹിപ്പിക്കുന്നു.
കാഴ്ചശക്തിയുടെ ആരോഗ്യം
മധുരക്കിഴങ്ങിൽ ബീറ്റാ കരോട്ടിൻ ധാരാളം അടങ്ങിയിട്ടുണ്ട്. ഇത് ശരീരത്തിൽ വിറ്റാമിൻ എ ആയി പരിവർത്തനം ചെയ്യപ്പെടുന്നു. അങ്ങനെ നല്ല കാഴ്ച നിലനിർത്താൻ സഹായിക്കുന്നു. കൂടാതെ, പ്രായമായവരിൽ കാഴ്ചശക്തി നഷ്ടപ്പെടുന്നതിനുള്ള ഒരു സാധാരണ കാരണമായ മാക്കുലാർ ഡീജനറേഷൻ സാധ്യത കുറയ്ക്കാനും ഇത് സഹായിച്ചേക്കാം എന്നാണ് പല പഠനങ്ങളും പറയുന്നത്. കണ്ണുകൾക്ക് നല്ല പോളിഫെനോളിക് സംയുക്തങ്ങളും ഇതിൽ അടങ്ങിയിട്ടുണ്ട്. മധുരക്കിഴങ്ങ് ഭക്ഷണത്തിൽ ഉൾപ്പെടുത്തുന്നതിലൂടെ, നിങ്ങളുടെ കണ്ണുകളുടെ ആരോഗ്യം മെച്ചപ്പെടുത്താനും പ്രായമാകുമ്പോൾ കാഴ്ച സംരക്ഷിക്കാനും കഴിയും.
തലച്ചോറിന്റെ പ്രവർത്തനത്തെ ഉത്തേജിപ്പിക്കുന്നു
മനുഷ്യശരീരത്തിന് അവർ കഴിക്കുന്ന ഭക്ഷണങ്ങളിൽനിന്ന് നിരവധി പോഷകങ്ങൾ ലഭിക്കേണ്ടതുണ്ട്. മധുരക്കിഴങ്ങ് തലച്ചോറിന്റെ ശരിയായ പ്രവർത്തനത്തിന് ആവശ്യമായ ആന്റിഓക്‌സിഡന്റുകൾ, ബി വിറ്റാമിനുകൾ എന്നിവ നൽകുന്നു. ആന്റിഓക്‌സിഡന്റുകൾ തലച്ചോറിലെ കോശങ്ങളെ ഓക്‌സിഡേറ്റീവ് സമ്മർദത്തിൽനിന്ന് സംരക്ഷിക്കുന്നു. ഇത് ഫ്രീ റാഡിക്കലുകളെ പുറത്തുവിടുന്നു. ഓർമ്മശക്തി മെച്ചപ്പെടുത്താനും തലച്ചോറിന് ആരോഗ്യകരമായ ഭക്ഷണക്രമത്തിന് ഇത് ഉത്തമമാണ്.
ഹൃദയാരോഗ്യം വളർത്തുന്നു
മധുരക്കിഴങ്ങിൽ പൊട്ടാസ്യം അടങ്ങിയിട്ടുണ്ട്. ഇത് സോഡിയവുമായി കൈകോർത്ത് പ്രവർത്തിക്കുകയും ഉയർന്ന രക്തസമ്മർദം നിയന്ത്രിക്കാൻ സഹായിക്കുകയും ചെയ്യുന്നു. ശരീരത്തിൽനിന്ന് കൊളസ്ട്രോൾ നീക്കം ചെയ്യാനും മധുരക്കിഴങ്ങ് സഹായിക്കുന്നു. മൊത്തത്തിൽ, ഈ ഫലങ്ങളെല്ലാം മികച്ച ഹൃദയാരോഗ്യം പ്രോത്സാഹിപ്പിക്കുകയും ഹൃദയാഘാതം, പക്ഷാഘാതം എന്നിവയുൾപ്പെടെയുള്ള ഹൃദയസംബന്ധമായ രോഗങ്ങളുടെ സാധ്യത വളരെ കുറയ്ക്കുകയും ചെയ്യുന്നു.
ശരീരഭാരം കുറയ്ക്കാൻ ഉപകാരപ്പെടും
മധുരക്കിഴങ്ങ് രുചികരവും ആരോഗ്യകരവുമാണ്. കൂടാതെ, ആരുടെയും ഡയറ്റിംഗ് പ്ലാനിൽ ഇത് ഒരു മികച്ച ഓപ്ഷനായിരിക്കും. അവ നിങ്ങളെ കൂടുതൽ നേരം വയറു നിറഞ്ഞതായി തോന്നിപ്പിക്കുന്നു. ഇത് അനാരോഗ്യകരമായ ലഘുഭക്ഷണങ്ങളിൽ ഏർപ്പെടാനുള്ള സാധ്യത കുറയ്ക്കുന്നു. കൂടാതെ, മധുരക്കിഴങ്ങിലെ കാർബോഹൈഡ്രേറ്റുകൾ സാവധാനത്തിൽ പുറത്തുവിടുന്ന തരത്തിലുള്ളതാണ്. ഇത് ഭക്ഷണസമയത്തെ വിശപ്പും ഭക്ഷണത്തോടുള്ള ആസക്തിയും നിയന്ത്രിക്കാൻ സഹായിക്കുന്നു. അതിനാൽ, നിങ്ങളുടെ ഭക്ഷണത്തിൽ ഒരു മധുരക്കിഴങ്ങ് ചേർക്കുന്നതിലൂടെ, നിങ്ങളുടെ ശരീരഭാരം കുറയ്ക്കുന്നതിനുള്ള ഊർജവും നൽകുന്നു.
