ഫ്രാൻസിൽ നിന്നുള്ള പേരുകേട്ട ഒരു വാനശാസ്ത്രജ്ഞനാണ് പുരോഹിതനായിരുന്ന ജീൻ പിക്കാർദ്. ഭൂമിയുടെ വലുപ്പത്തെയും ആകൃതിയെയുംകുറിച്ചു പ്രതിപാദിക്കുന്ന ശാസ്ത്രശാഖയ്ക്ക് (geodesy) അടിസ്ഥാനമിട്ട ശാസ്ത്രജ്ഞരിലൊരാളാണ് അദ്ദേഹം. അദ്ദേഹത്തിന്റെ കൃത്യതയാർന്ന പരീക്ഷണങ്ങൾ നമ്മുടെ പ്രപഞ്ചത്തെക്കുറിച്ചുള്ള അറിവ് വളരെയധികം വർധിക്കുന്നതിന് കാരണമായിട്ടുണ്ട്. കൂടാതെ ഐസക്ക് ന്യൂട്ടൻ നടത്തിയ പല പരീക്ഷണങ്ങളുടെയും അടിസ്ഥാനമായി വർത്തിച്ചിരിക്കുന്നത് ജീൻ പിക്കാർദിന്റെ ശാസ്ത്രീയനിരീക്ഷണങ്ങളാണ്.
ജീൻ പിക്കാർദ് ഫ്രാൻസിലെ ല ഫ്ലേഹെ നഗരത്തിൽ 1620 ജൂലൈ 21 നാണ് ജനിച്ചത്. അവിടെത്തന്നെയുള്ള ജെസ്വിട്ട് സ്‌കൂളിലാണ് അദ്ദേഹം വിദ്യാഭ്യാസം നടത്തിയത്. ശാസ്ത്രീയവിഷയങ്ങളിലും സാഹിത്യപഠനത്തിനും വലിയ പ്രാധാന്യം നൽകിയ വിദ്യാഭ്യാസ സമ്പ്രദായമായിരുന്നു ഇക്കാലത്ത് ജെസ്വിട്ട് സ്‌കൂളുകളിൽ നൽകിയിരുന്നത്. ജീൻ പിക്കാർദ് ഗണിതം, വാനശാസ്ത്രം, ദൈവശാസ്ത്രം തുടങ്ങിയ വിഷയങ്ങൾ പഠിക്കുകയും വൈദികവൃത്തിയും ശാസ്ത്രപരീക്ഷണങ്ങളും ഒരുമിച്ച് മുന്നോട്ടു കൊണ്ടുപോവുകയും ചെയ്തു. അദ്ദേഹത്തിന്റെ ശാസ്ത്രാഭിരുചി തിരിച്ചറിഞ്ഞ അധികാരികൾ ജീനിനെ പാരിസിലേക്ക് അയയ്ക്കുകയും അവിടെവച്ച് അക്കാലത്തെ പ്രമുഖ ശാസ്ത്രജ്ഞരെ അദ്ദേഹം പരിചയപ്പെടുകയും ചെയ്തു.
1655 ൽ ജീൻ ഫ്രാൻസ് കോളേജിലെ അധ്യാപകനായി നിയമിതനായി. ഇത് കൂടുതൽ ശാസ്ത്രീയപരീക്ഷണങ്ങൾ നടത്താൻ അദ്ദേഹത്തിന് അവസരമൊരുക്കി. ടെലസ്കോപ്പിന്റെ കണ്ടുപിടുത്തം ഇക്കാലഘട്ടത്തിൽ വാനനിരീക്ഷണത്തിൽ വലിയ മാറ്റങ്ങൾ കൊണ്ടുവന്നിരുന്നു. ഭൂമിയുടെ ധ്രുവരേഖ അളക്കുന്ന വിധം ജീൻ വികസിപ്പിച്ചത് അദ്ദേഹത്തെ വളരെ പ്രശസ്തനാക്കി. 1669 ൽ ലൂയി പതിനാലാമൻ രാജാവിന്റെ നിർദേശപ്രകാരം ഭൂമിയുടെ വലിപ്പം കൃത്യമായി നിർണ്ണയിക്കാനുള്ള ദൗത്യം ജീൻ ഏറ്റെടുത്തു. അന്ന് ലഭ്യമായിരുന്ന ആധുനികരീതികൾ ഉപയോഗിച്ച് ഭൂമിയുടെ ധ്രുവരേഖയെ അടിസ്ഥാനമാക്കി അക്ഷാംശരേഖയുടെ ദൈർഘ്യം അദ്ദേഹം കൃത്യമായി കണക്കാക്കി.
വിദൂരത്തിലുള്ള വസ്തുക്കൾ കൂടുതൽ വ്യക്തമായി കാണാവുന്ന ദൂരദർശിനികൾ അദ്ദേഹം വികസിപ്പിച്ചു. ആദ്യമായി, ജ്യോതിശാസ്ത്ര നിരീക്ഷണങ്ങൾക്ക് കൃത്യമായ സമയം നിശ്ചയിച്ച പെൻഡുലം ക്ലോക്കുകൾ അദ്ദേഹം തന്റെ പരീക്ഷണങ്ങൾക്ക് ഉപയോഗിച്ചു. ഭൂമിയിലെ ഒരു സ്ഥലത്തുനിന്നും മറ്റൊരു സ്ഥലത്തേക്കുള്ള ദൂരം അളക്കുന്നതിന് ത്രികോണം ഉപയോഗിച്ചുള്ള അളവുരീതി അദ്ദേഹം നടപ്പിലാക്കി. ആധുനിക സർവേയിംഗിന്റെ അടിത്തറയായി പിന്നീട് ഈ രീതി മാറി. ഒരു ഡിഗ്രി അക്ഷാംശത്തിന്റെ ദൈർഘ്യം 111 കിലോമീറ്ററായി ജീൻ പിക്കാർദ് കണക്കാക്കുകയും അതിൻപ്രകാരം ഭൂമിയുടെ ചുറ്റളവ് ഏകദേശം 40,000 കിലോമീറ്ററാണെന്ന് നിശ്ചയിക്കുകയും ചെയ്തു.
വാന നിരീക്ഷണരംഗത്ത് വലിയ സംഭാവന നൽകിയ ശാസ്ത്രജ്ഞനാണ് ജീൻ. ഭൂമിയിൽനിന്ന് സൂര്യനിലേക്കുള്ള ദൂരം അളക്കുന്ന സോളാർ ദർശനസ്ഥിതി വ്യത്യാസം (solar parallax) അദ്ദേഹം നിർണ്ണയിച്ചു. ഇന്നത്തെ അറിവ് വച്ച് അത് കൃത്യമായിരുന്നില്ലെങ്കിലും ജ്യോതിശാസ്ത്രരംഗത്ത് ഇത് വലിയ തുടക്കമായിരുന്നു. അദ്ദേഹം ചന്ദ്രനെയും കൃത്യമായി നിരീക്ഷിക്കുകയും അതേക്കുറിച്ച് എഴുതുകയും ചെയ്തു. ആകാശഭൂപടം അദ്ദേഹം രൂപകൽപന ചെയ്യുകയും പല നക്ഷത്രങ്ങളുടെയും സ്ഥാനം നിർണ്ണയിക്കുകയും ചെയ്തത് പിൽക്കാല ശാസ്ത്രജ്ഞർക്ക് സഹായകമായിത്തീർന്നിട്ടുണ്ട്. ശാസ്ത്രമേഖലയിൽ തന്റേതായ വ്യക്തിമുദ്ര പതിപ്പിച്ച ജീൻ പിക്കാർദ് പ്രപഞ്ചത്തിലെ പല ദൂരങ്ങളും നിർണ്ണയിക്കുന്നതിൽ അവലംബിച്ച മാർഗങ്ങൾ പിന്നീട് വന്ന ശാസ്ത്രജ്ഞന്മാരെ വളരെയധികം സഹായിച്ചിട്ടുണ്ട്. പഴയ തത്വശാസ്ത്ര വിശകലനങ്ങളിൽ നിന്നും മാറി പരീക്ഷണനിരീക്ഷണങ്ങളിലൂടെയാണ് ശാസ്ത്രം വളരേണ്ടത് എന്ന് അദ്ദേഹം പഠിപ്പിച്ചു. ശാസ്ത്രചിന്ത വിശ്വാസത്തിന് എതിരല്ലെന്നും അദ്ദേഹം വിശ്വസിച്ചു.
പാരീസിൽ വച്ച് 1682 ജൂലൈ 12 നാണ് ജീൻ പിക്കാർദ് അന്തരിച്ചത്. ചെറിയൊരു ജീവിതകാലയളവിനുള്ളിൽ അദ്ദേഹം വലിയ ശാസ്ത്രീയസംഭാവനകൾ നൽകിയിരുന്നു. ആധുനിക ജിയോഡെസിയുടെ ആരംഭകൻ എന്ന നിലയിൽ മാത്രമല്ല, നവോത്ഥാന കാലഘട്ടത്തിൽ വിശ്വാസത്തെയും ശാസ്ത്രീയ അറിവിനെയും സമന്വയിപ്പിച്ച വ്യക്‌തി എന്ന നിലയിലും അദ്ദേഹത്തിന് വലിയ പ്രാധാന്യമുണ്ട്. നാം വസിക്കുന്ന ഈ ഭൂമിയെക്കുറിച്ചുള്ള വിലപ്പെട്ട അറിവുകൾ പ്രദാനം ചെയ്ത ശാസ്ത്രജ്ഞൻ എന്ന നിലയിൽ ജീൻ ഇന്നും അനേകരെ പ്രചോദിപ്പിക്കുന്നു.
ഫാ. മാത്യു ചാർത്താക്കുഴയിൽ
