“എന്റെ ആത്മാവ് കർത്താവിനെ മഹത്വപ്പെടുത്തുന്നു” – മറിയത്തിന്റെ സ്തോത്രഗീതത്തിന്റെ ആദ്യവാക്യമാണിത്. സ്വന്തം ജീവിതത്തിൽ ദൈവം പ്രവർത്തിച്ച വലിയ അദ്ഭുതവും ഏലീശ്വായുടെ ജീവിതത്തിൽ ദൈവം നൽകിയ വലിയ അനുഗ്രഹവും കണ്ട മറിയം എല്ലാ മഹത്വവും ദൈവത്തിനു നൽകുന്നു.
ജീവിതത്തിൽ ദൈവം വർഷിക്കുന്ന അനുഗ്രഹങ്ങൾക്കും കൃപകൾക്കും കാരണം തന്റെ യോഗ്യതയല്ല, മറിച്ച് ദൈവത്തിന്റെ കാരുണ്യമാണ് എന്ന് നമ്മളും മനസ്സിലാക്കേണ്ടതുണ്ട്. സ്വന്തം ജീവിതത്തിലെ നേട്ടങ്ങൾക്കും ഉയർച്ചകള്‍ക്കും വിജയങ്ങൾക്കും പിന്നിൽ ദൈവമാണ് എന്ന് മനസ്സിലാക്കി ജീവിതം നന്ദിയുടേതാക്കി മാറ്റിയാൽ നമുക്കും യഥാർഥ ആനന്ദത്തിലേക്ക് കടന്നുവരാനാകും. “മറിയം അവളോടുകൂടെ മൂന്നുമാസം താമസിച്ചു; പിന്നെ വീട്ടിലേക്കു മടങ്ങി” (56) എന്നാണ് വചനം പറയുന്നത്. മറിയം സാധാരണജീവിതത്തിലേക്കു മടങ്ങുമ്പോഴും അവളുടെ അധരങ്ങളില്‍ സ്തോത്രഗീതമാണ്. നിത്യജീവിതത്തിന്റെ ഓരോ വേദിയിലും ദൈവത്തിന് സ്തോത്രം പാടാന്‍ നമുക്കും സാധിക്കട്ടെ.
ഫാ. ജി. കടൂപ്പാറയിൽ MCBS
